Rakhine Ram Um Chin CSO Nih Tlangcung Vuanci Rian In Chuah An Timh

Rakhine ram um Chin CSO nih Rakhine ramkulh Tlangcung Vuanci rian i phuah dingin an nawl Rakhine ram ah a ummi Chin Civil Society Organization (CSO) bu 6 fonh in ralhrangbu innhngak cozah nih Rakhine ramkulh tlangcung miphun vuanci caah Chin miphun U Tin Hla an khinh mi cungah nihin August 8 ah duhlonak cathanh an chuah.

Rakhine ram Chin CSO hna nih tulio Kawlram dirhmun zoh ah Chin miphun telin ramchung mipi vialte democracy ram ser khawhnak dingah thisen le nunnak pek in a lamkip in kan i zuam lio a si caah ralhrangbu riantuannak kalpi dingin rian khinh mi cu cohlan ding a si lo tiah kan hmuh.

U Tin Hla hi Rakhine ram ah a ummi Chin miphun hna nih an thimmi a si lo lengah Rakhine ram ummi Chin miphun hna aiawhtu a si lo.Ralhrangbu cawlcangh ning cu mipi nih duhmi democracy kalphung he a kalh mi a si caah ralhrangbu uknak tang na riantuannak cu chuah tak dingin kan in nawl.Na rian na chuahtak lo a si ahcun ralhrangbu riantuannak cungah tuanvo lak ding le social punishment kan in tuah lai.

Rakhine ramkulh chung a ummi civil society siseh, pumpak in siseh, ralhrangbu uknak tang riantuannak ah zeibantuk lam hmanh in i pehtlaih lo dingin fak piin kan forh hna tiah Rakhine ram um Chin civil society hna nih an thanh.Rakhine ram chung hrambunh mi civil society hna hi Arakan Chin Together (ACT), Chin University Students in Rakhine State (CUSR), Chin Humanitarian Assistance Team (CHAT), Cumtu Chin Youth (Oversea), Hpalakya Youth Group (HYG), Laitu Chin Youth Network-Yangon (LCYN-Ygn) hna an si.

Source: CUSR (TCP)

Author: admin

Leave a Reply

Your email address will not be published. Required fields are marked *