Chin Miphun Nih A Ho Nunnak Dah Kan Khamh Lai Ti Lo Ah Chin Person Of The Year Kong Hi Cu Kan Rak Chim Rih Lo A Tha

CHIN PERSON OF THE YEAR.Kan hawi nih aho nunnaak dah kan khamh khawh lai ti in an buai lio ah Chin Person of the Year kong zong nan von chimrel pah hna caah von i thlaak ta ka duh ve.Nan uarmi le mifel bik tiah nan hmuhmi hna min nan von tar cio hna. Yangon in Rev. Fr. Thawng Tha Thang, Halkha in Saya Cung Hu le Khampat in Dr. Van Rum an si.


Keimah pumpaak hmuh ning ahcun an fel dih, an rianttuan ning zong a ropui dih, ka uar dih hna. Cun, an zaapi tein ka hawi ttha lawngte an si.Rev. Fr. Thawng Tha Thang hmang in Pathian nih mi nunnaak tampi a khamh cang hna. Saya Cung Hu zong Laimi caah ai peeknaak caan a tawi ti lo hlei ah mi nunnak tampi Pathian nih amah hmang in a khamh cang hna.

Dr. Van Rum zong Kalay ah khatlukin zawtnaak a karh lio ah Khampat ah faak in outbreak si lo ding in a kham khawhmi hi a ropui bak ve. Amah hmang in Pathian nih minung tampi a khamh ve cang hna. Pathian nih a hman dih hna an umnaak khua cio ah.Asinain Chin Person of the Year kong hi cu chim rih hna hlah usih law a ttha. An peekmi minung poh kha va pe te ko hna seh. Minung pakhat kan ttanh ruang ah midang caah tthadernaak hna a rak si sual lai ti kha phan a um.

Anmah pathum zong hi Chin Person of the Year hmuh duh ah hi rian hi an ttuanmi asi lo. Laimi an kan dawt ruang ah an ttuanmi kha asi ko. Kei nih ka hmuh ning ahcun Chin Person of the Year timi title hna hi cu Laimi kan umharphen i nan tuah sawhsawhmi ah khin ka chiahmi asi. Jesuh tu nih an i tlaak ning cio in laksawng tthami a peek te ko hna lai. Atu lio ahcun kan lung ai rualnaak ding lam lawng kha kawl cio rih ko hna usih. Kan thih lai le kan nun lai hmanh theih asi lo.

Credit: Aung Myint Thang

Author: admin

Leave a Reply

Your email address will not be published. Required fields are marked *