Mon Ramkulh Mudo Peng Khuabawi Pakhat Cu Meithal In An Kah Thah

Minchiatnak lei Minthang Hnipadawh khuabawi thah a si.Mon ramkulh Mudo peng Hnipadawh khuabawi U A Mang cu nihin July 31 zaanlei suimilam 5 le cheu hrawngah meithal in kah/thah a si tiah khua hruaitu hna nih an chim.

Khuabawi U A Mang hi tu zaanlei zung in a rak tin lio, a inn phak lai lampi ah a ho ti theihlo mi 2 nih cycle im an rat hnawh i meithal in an kah mi a si. Khuabawipa hi meithal in zun 4 kah a si i, Thanphyuzayat sii inn ah tlik pi a si hnuah sii inn ah a thi.

Amah khuachungah zan fatin khual cazin a chek, thla fatin phaisa a kholh hna hlei ah khua mipi hna zong a hro, a thihphaih peng hna caah minchiatnak lei ah min a thang ngai mi pakhat a si. Mon ramkulh chungah ralhrangbu nih a khinh mi khuabawi thah a tong mi 4 an um cang tiah Than Lwin Times nih a tial.Credit;The Chin Post

 

Matupi-Mindat kar Kahdohnak ah SAC Ralbawi Ngan Pakhat a Thi.July 30 ah a cangmi Matupi-Mindat karlak kahdohnak ah SAC ralhrang ralbawi ngan Lieutenant Colonel rank pakhat a thi ve, tiah kan theih. A thimi SAC ralhrang bawi hi Kha Ma Ya (304) ah ralbawi (တပ်ရင်းမှူး) a simi Leut. Col. Zaw Zaw Soe (kum 48) a si.Kha Ma Ya (304) hi Hakha in an i thawh i Matupi le Mindat lei ah a kalmi ralkap bu an si, July 30 ah Matupi-Mindat karlak mengtung no. 73 zawn ah CNF, CDF-Matupi le CDF-Mindat i bawm in SAC ralhrang he kahdohnak a chuak. Kahdohnak a chuah lecangka in Leut. Col. Zaw Zaw Soe telh in a dang SAC ralhrang pa 4 hi hliamhma fak ngaiin an pu colh.

Mengtung no. 73 kahdohnak hi zaan sml. 7:00 in zaan sml. 12:00 tiang hrawng a rau, Hliamhma a pumi Leut. Col. Zaw Zaw Soe cu a hliamma he a nunnak a liam. CDF nih July 31 thawng an chuahmi ah Leut. Col. Zaw Zaw Soe telh in ralhrang 10 an thi, tiah an langhter.SAC thawngzamhnak Myanmar Alin ah Leut. Col. Zaw Zaw Soe a thihmi kong he pehtlai in SAC nih July 31 ah thawngthanhnak ca an ttial.

Leut. Col. Zaw Zaw Soe hi Yangon ramtthen, Hlaing Thayar ah a ummi Myanmar ralkap hlun U Tin Soe i a fapa a si, tiah an langhter chih. Mengtung no. 73 kahdohnak ah CDF-Matupi in mino pathum nih ram le miphun ca ah an nunnak an pek ve. A nunnak a liammi hna cu, Salai Kung Thang, Salai Ha Tun, Salai Thang Chin Sang hna hi an si.

July 30 zaanlei sml. 2:00 hrawng ah Mindat-Matupi kar mengtung no. 76 ah i kahnak a um tthan. Hi kahdohnak zong ah hin CNF nih CDF-Matupi le CDF-Mindat an bawmh hna.CNF le CDF lei in hliam a pumi le a thimi an um lo. SAC ralhrang lei in a thimi an um le um lo theih a si rih ve lo. Nihin July 31 chun sml. 12:00 tiang ah zei bantuk kahdohnak hmanh a um rih lo. The Chin Journal

Author: admin

Leave a Reply

Your email address will not be published. Required fields are marked *