Mindat township chhunga inkahna avangin khaw 10-a mite ramhnuai lamah raltlan

Chin state chhim lam, Mindat township chhunga CDF-Mindat leh Military council sipate inkara inkahna chhuah leh avangin, Mindat township chhunga awm khaw 10-a mipuite chu mahni sahimna zawngin ramhnuai lamah an tlan chhiat thu hriat a ni.

A bik takin inkahna hnai vai khuaa mite an tlan chhia a. Inkahna hmunte chu Magway region leh kan Chin state nena inri, Thi Lin bula Shwe Aung Ta vel atangin sipaite chu an rawn chho a, inkahna hmun tak tak chu Shwe-Tuin-too, DengTi, Sun Taung, Taung Khong leh Pi-Hu khuaahte a ni a.

Khaw thenkhatah chuan tumah an awm tawh lo, an vai tlan chhuah vek a. Thenkhat chu an lo neihna hmunah silpaulin zarin an awm ringawt a. Engzat nge an nih erawh chhut thiam a har deuh,” tiin Mindat township raltlante tanpuitu pawl zinga mi pakhat chuan a sawi a ni.

 

CDF-Mindat leh Military council te inkara inkah haina chungchanga inbiakna chu July ni 16 khan chhunzawm theih a nih tak loh avangin, July ni 21 atangin Chin state leh Magway region nena inrina Shwe-Tuin-too khaw lamah inkahna chu a chhuak leh ta a ni. Mindat township chhunga inkahna a chhuah leh tak avagin, raltlan awmzat chu an pun belh leh a, an ei bar tur leh damdawi mamawhna pawh a san chho zel thu raltlan tanpuitu pawla mi pakhat chuan a sawi a.

Harsatna chu sawi chhuah sen lohvin a tam. A bul berah chuan buhfai a ngai a, damdawi a ngai bawk a. Military council lam lahin buhfai thiar theih chin bituk zat an nei a, an phal chin bak chu a thiar theih loh a ni. Buhfai hi lei dawn pawhin a lei mai theih loh. Damdawi lah kan lei lai min hmuh chuan mi man mai, a thiar theih loh bawk. Chuvangin, buhfai leh damdawi lamah kan harsa a, kan mamawh ber bawk a ni,” tiin a sawi.

Chin state Mindat khuaah April thla tawp lam atang khan sipai thuneihna lak duh lohna lantirtu mipuite chu military council sipaiten tharum hmanga mana silai hial an hmeh puah tak avangin, Chin Defense Force-Mindat pawl dinin Military council pawl nen nasa takin an inkap zui a. Tualchung mi sing chuang chu mahni awmna khuate chhuahsanin ramhuai lamah an tlan chhia a.

A hnuah Mindat khawtlang upate inrawlh a, inbiakremna angin CDF-Mindat leh Military council sipaite inkarah June ni 20 thelng inkahhai a lo ni a, mahse July ni 16 atangin inbiakrem leh theih a nih tak lohah chuan inkahna nasa tak thleng lehin tualchhung mi za tel chu ramhnuai lamah an raltlan leh ta a ni. Crd The Tahan Post.

Author: admin

Leave a Reply

Your email address will not be published. Required fields are marked *