Myanmar Tui Lianah Mi Sang Tam Takin Harsatna Tawk Mek

Myanmar Tui Lianah Mi Sang Tam Takin Harsatna Tawk Mek,

=================================

Myanmar chhim lam Kayin state, Mon state, Rakhine leh Tanintharyi region-ah July ni 25 atang khan tuilianin mipui 3000 chuang harsatna siam tan a, hmun thenkhatah chuan chhanchhuahna hna thawh a ngaih thu tlawmngai pawl lamin an sawi.

Mon state chhunga Mawlamyine, Yi, Chaih-ma-yaw leh Chuang Sone, Kyin state chhunga Hlai-boih, Rakhine state chhunga Tan-Twei khua leh a a bul hnai khua Chaung-taih, Letpansu, Nat-Pin, Zadipin te, Tanintharyi region-a Luang-Lone township-ah te chuan nimin lam atang khan hmun thenkhatah a khaw puma tui chim, lei min leh ei leh bar kawnga harsatna a thleng chho tan tih hriat a ni.

 

Kayin state Hlai-Boih township chhunga veng tam zawkah chuan tui chim chin a rawn san chhoh zel avangin, khaw chhung mi 100 chuang chu khaw thenawma an chhungte hnenah an insuan tih hriat a ni bawk a.

Mon state, Mawlamyine, Yi, Chaih-Ma-yaw leh Chaung-Sone khuate pawhin tui lian satliah mai ni lovin, ei leh bar lamah haratna an tawk tan a, leh lamah Covid hri kai damlo awm bawk nen dam khaw chhuah tuma an beih mek thu Mawlamyine khua Shwe Taung venga awm U Ang-Nuu chuan heti hian a sawi a.

Tunah hian ruah a sur nasa lutuk a. Motor leh bike a tlan thei tawh lo. Kawngpui leh in lah a inzawl bawk si a, in chhungah tui a lut vek a. In tina inhlawh chawp tan chuan khawsak chu harsa tak a ni. Ei tur pawh tut emaw min pek kan ei kual ve mai mai a ni,” tiin.

Chutih laiin veng chhungah Covid vanga damlo leh oxygen mamawh, kham khawp hmuh loh avanga thite an awm deuh reng bawk a, in chhunga tui lut nen damkhaw chhuah tumin kan bei hlawm a ni tiin a sawi belh bawk.

Covid hripui vanga damlo buaipui leh thite halralna tur buaipui ngai bawka mipui buai laiin, tunah tuilianin buaina thar a rawn belhchhah leh bawk a. Tlawmngai pawl chairman U Nyi Moe Aung chuan, “Khaw pumah tlang sang deuh lai chiah a bang tawh. A pil vek a ni mai. Nimin chuan kan theih ang tawkin chhanchhuah hna kan thawk a.

Vawiin lamah chhungkaw 60 tan chawfun kan sem a. Tui lah chu a rawn sang chho zel a, relief center te lah chu hawn a la ni si lo va. A theih ang angin inah an la awm lui a. Chhungkaw 60 ei tur chawfun 150 vel buatsaih a ngai a. Engtin nge kan tih zel dawn pawh kan hre tawh lo. Sorkar ruahmanna lah engmah kan hre si lova. Chhanchhuah hna kan thawk dawn nge, Covid vanga thite halral hna kan thawk dawn nge, enkawl ngaite kan enkawl zawk dawn tih pawh hre lovin, kan buai a ni ber mai,” tiin a sawi a.

Mon state khawpui Mawlamyine chu lui pui depa awm a nih angin kumtin tuilianin a nuai ziah a, mahse tun dinhmunah chuan covid hripuiin a chen chilh lai a nih bawk avangin, an buaina a thuah hnih ta a ni. Covid damlote tanpuitu Mon state, Chuang-sone township state MP Dr. Aung Naing Oo chuan, “Tui lian buainain Covid-19 enkawlna lam a khawih buai a.

Tunah chuan Oxygen thiar leh damlo phur chhuah bakah hna thawhna khawl lamah harsatna tam tak a rawn. The Tahan Post awm chho a. Chuvangin, he tuilian pawh hian Covid-19 hripui hi a thawp zawngin a kalpui a nib er mai,” tiin a sawi a. Mon state chhunga Military council pawlte RFA-in tanpuina leh chhanchhuah hna chungchanga an kalpui dan tur a zawh chuan, anni chuan ‘Thuneitu lam zawt zawk rawh’ tiin an lo chhang a ni awm e.

Hetih laiin hian Myawaddy lamah pawh nimin lama tuilian chu a la tla hniam thei mai lova, mipui 4000 chuangin an chenna in chhuahsanin harsatna an tawk mek tih hriat a ni. The Tahan Post

Author: admin

Leave a Reply

Your email address will not be published. Required fields are marked *