Myanmar Meithal keng Film Star Htar Htet Htet-in A pa sunnak ca a ngan mi hi sumawk a va har ve aw

Myanmar Meithal keng Film Star Htar Htet Htet-in A pa sunnak ca a ngan mi hi sumawk a va har ve aw, June ni 26 ah khan military council Ralkap pawlih thuneihnak duh lotu lakih tel Myanmar model lar Hta Htet Htet, Karen state KNU control area-ih meithal keng ih D Day nghak rero tu a pa can thu leh sunzia cu hiti hin a social page a ngan a si.

Chibai buknak netabik khal ka nei thei lo, Ka pa, rak tho leh aw maw…tiih bul tannin, Ka pa I fanu rak kir leh can nghak lovin, in tan ta ih. I fanu khawvel leh a thil neih hmuah hmuahkhal. Ka pa ka lo biak lohnak hi thla 4 a kim thlang ih, kan biakawk lohnak leh na hmel ka hmuh lohnak chu thla 4 a si zo. Ka pa a dam leh dam loh thuhla cu mi dang hnen ih sin ka rak sut ring ring theu, Ni 2 liam zo mi ah khan na pum nat thu ka rak theiih ka thin a bang zet ih, ka lo phone ding  tiin tusun hi ka lo biak tum ni a siih, biak awk theih lo leh hmuaw thei lo dingin na fanu hi in fehsan ta a maw.

Na fanu hi in sunlawih ih, hramlakah ei leh in khawsak harsa takih ka um cu a har tuk tiin narak sim theu ti aw,  na fanu umnak hi electric leh internet umnak hmun a si vekin, a theihnak hmun pan a tul theu, tuzing zing lam ah khan internet hman theihnak hmunah ka feh hman lo ih, zan lamah video call-in kan biakaw ding tiin ka rak suangtuah ih, ziangah saw zanlam ah in feh san, ka pa. ziangah saw tusun ni kher kher ih in tan san, na fanu hi a va vansia lawmmam ve, Ka fanu, na ra tlun tikah cun hrisel leh hlim takin kan um ding na ti kha, hiti mai in in fehsan fawn.

Ka pa, na hringnun ngannak cahnah pakhat talk a duh, na nunih harsatnak na pahtlang dan pawl   ni khatah phek khat rak ngan aw ka lo tih kha cu mi cu in hmuh hrih lo ih. Na ngan theh hrih lo  pi, kei mah khalin ka rak siar hrih lo pi. Khualtlawn huphurh tak ka Pa, Varanasi-ah sungkuain feh dingin kan lo ti kha, aw kan feh ding tiin in tiam zo kha. Tuah a feh thei lo ruangah ka lo nghak ring ring ho khaw, ka pa. sungkua kim ten  thla la dingin dawr ih na feh duh lo ruangah in ih koh kan tum mi khal ka hman hrih lo nan ho khaw ka pa.

Ka pa, na fanu ra tlun tik cu k arak nghak ding na ti kha, na fanu in ka tuar thei lo. Ka pa, ka lo duhdawt tuk ho khaw. Ka tuar thei lo a si. na ra kir leh chiah ka duh. Kan be aw hman lo ih, kan hmuaw hman fawn si lo. Tusunah hin hmuawih biakawk kan tum ziangah saw tusun ni kher kherih an tan san mai le, tiin a fanu thinlung mu ril takih a pa sunnak thu a ngan mi a si.

 

 

 

Author: admin

Leave a Reply

Your email address will not be published. Required fields are marked *