MIZORAM LEH ASSAM RAMRIAH INKAP ASSAM LAM 6 THI

Assam Police ten ngam lo chalah chil an hnawm em ni, Nimin, July ni 26 tlai lam khan Mizoram leh assam ramriah inkap Assam lam 6 thi.

Mizoram leh Assam inrina state boundary bulah ram pahnihte mipuite an innawr na hle a, Assam lam police-in Mizoram chhunga IR police, duty post awmna tura sak chu hneh chhuh tumin force thahnem tak hmachhuanin an luah lut lui a. Kolasib district SP pawh a hmunah inbiakrem dan kawng zawngin a awm ve reng tih hriat a ni.

Mahse, Assam lam chu inhnukdawk duh lova inremna dinglai ‘Status Quo’ bawhchhiain Mizoram police te chu nawr chhuah an tum tlat a. Chutih rualin, Mizo Civil mi khualzin, Assam lam atanga Mizorama lut turte chu sawisain an car te an tihchhiat sak a, chu bakah tear gas nen civil mite chu ral beiha beiin, silai hial hmetpuak hmasaa an ṭan zui tak avangin, tlai lam dar 4:30 velah loh theih lohin inkahna a thleng ta a ni.

 

He inkahna hian minute 50 chhung vel a awh a. Assam lamah SI police telin mi 6 an thih bakah hliam engemaw an awm tih hriat a ni a. Mizo sipaite chu tumah hliam leh thi an awm hriat a ni lo va. Mahse, Vairengte tlangval PC Lalmuansanga S/o PC Zoramliana, Venghlun chu Assam police ten a malah silaiin an kap tlang a, Kolasib District Hospital OPD-ah hruai nghalin Xray a nih hnuah operation kalpui a nih thu AIR news corespondent Pu Andrew-an a sawi a ni.

Assam lamin LMG an hmehpuah hnu deuh lawkah Mizoram sipaite chuan puak rangin an rawn tlir zui ve nghal a, tanhmun tha zawk leh duh thala position lo la lawk tawh Mizoram sipaite chhan letna chu Assam lam chuan an khan lo hle a. Inkah lai chuan mipui leh police tam tak chu Assam ramri lamah an tlan lut nghal dul dul a. A tawpah Assam police lamin tawnzau var vai chhuakin a tlawmzia an lantir a. An inhnukdawk zui nghal bawk a ni.

Hetia an tawlhsawn hnu hian an rawn kalna bus, bolero motor leh jeep te chu an tlanchhiat san a, motor chhungah chuan indanna phaw, misual vuakna tiang leh thil dang an hnutchhiah teuh bawk tih hriat a ni.

Mizoram leh Assam ramri buaina hi a rei tawh ang reng hle a. Ni kum hmasa lam pawh khan MZP leh Assam police-te chu lo inhmachhawnin Assam lamin silai an hmet puak a, MZP lamah hliam an awm nual a. Mizoram sorkar leh mipuite chuan kum 1875, British huna laia state boundary lo rin fel tawh chu tanchhanah neiin an la ring tlat a. Chutih hun lai chuan Sapho chuan Assam leh Mizoram inkarah Forest reserve area zau tak dahin Tlangmi Mizoram chim ral mai theih lohna turin an lo ruahman a; mahse chu forest reserve area enkawl tur chuan state puitling zawk Assam sorkar chu mawhphurna pek a ni a.

Chu mi hnu chuan Assam lamin an duh angin forest area chu an sawngbawl chho a, ramri chungchangah pawh kum 1933 leh 1971-ah rikhamte siamin, Central sorkar laipuiin a taka inrawlhna leh chin fel tak tak tumna a neih loh avang bawkin, Mizoram chu an nek ta zel a, tun thlengin buaina chu a inmun chho a, a tawpah silai a puak ta a ni. Vanglaini.

 

Author: admin

Leave a Reply

Your email address will not be published. Required fields are marked *