Aung San Suu Kyi Silaia Tintu Captain Myint Oo Covid Vangin Thi

Aung San Suu Kyi Silaia Tintu Captain Myint Oo Covid Vangin Thi, Kum 1989-a Pi Aung San Suu Kyi silaia kah tuma tintu Captain hlui Myint Oo chu Covid-19 kaiin, sipai damdawi ina inenkawl tura a dilna chu hnawl a nih hnuah a thi thu hriat a ni.

Kum 1990 general election campaign hun laiin Aung San Suu Kyi-i Ayawaddy region, Hmaw Chun khaw zin kawngah DaNuPhyu township State Law and Order Restoration Council Secretary Captain Myint Oo chuan silaiin kah a lo tum tawh a. Chu tih lai chuan Captain Myint Oo chu LIB 108 division pakhat enkawltu leh DaNuPhyu-a security latu ber a nih rualin khaw chhungah mi 5 aia tam punkhawm phal loh tih order chhuah hun lai a ni a.

Mahse, sorkar phalna hmunah chuan inthlan campaign a huaihawt theih thung a, Pi Suu Kyi-i te pawl haw lam chuan DaNuPhyu kal phalna lamah ni lovin, Myoma bazar lama an luh avangin Captain Myint Oo chuan kah a tum thu hrilhin silaiin a lo tin a. Mahse, a aia lal township level State Law and Order Restoration Council chairman Major Tin Pyi Aye leh LIB 108-a Major Maung Thun te chu lo thleng hmanin Major Tin Pyi Aye chuan Captain Myint Oo chu kuah betin, “Hei! Hei hi indona hmun a ni lo, politics thil a nih hi,” tia hrilhin silai hmeh puahna order a sut nghal a.

Chu veleh Captain Myint Oo chuan a dara bel awmte chu pawt thlain a paih vek a. A hnuah, a thianpa pakhat chuan ‘chutianga a belte a pawh thlak nachhan chu Suu Kyi-i a kah theih loh vang ni lovin, kah theih chin tih order chhuah a nih tawh hnua kap thei lo a, order an sut leh chawpchilh avang a ni zawk a. Chung lam thuneitute Order ngaipawimawh thin Captain Myint Oo atan chuan order sut leh nghal mai ang chi chuan a tithinrim hle a ni,’ tiin a sawi. Tin, chutia an inkah dawn lai boruak thlen hma zawngin Captain Myint Oo leh a sipaite chuan Pi Suu Kyi-i an la hmuh ngai loh thu a sawi bawk a.

A pute thupek zawm tha viau mah se, Captain Myint Oo chu mipui bengah misual thanin a thang zawk a, Pi Suu Kyi-i silaia tina kahna order chhuah a nih dan te chu ‘Beyond Ragoon’ leh ‘The Lady’ tih movie-ah pawh hmuh theih tura chan a ni. Sipai bang tawh Captain Myint Oo chu Covid hri kaia a dam loh hnuah sipai damdawi in khum 1000 awmnaah inenkawl tuma a ngenna chu pawmsak a ni lova. Ani chuan a social page-ah, ‘ka lo Hring (sipai lamah atang) reng tawh a, uai thla mai tur nih tawh hnua Sen (NLD) leh chu ka duh lo tia bul tanin, sipai damdawi inpui khum 1000 lenna chu July ni 18 khan harsa takin ka be pawp a, an mi chhan dan chu ngaihthlak a hrehawm kher mai.

Ni 19-ah ka hnar atangin an test a, min hrawk hrep lehnghal a. Ni 20-a ka lo positive tak avangin, Quarantine center lamah ka va kal a, min lo pawm lo va, motor tlan lut thei tura phalna lak a kirh dan te pawh sawi dawn chuan a tam lutuk. Covid hri kai avanga quarantine center-a luh tum na na na, oxygen a tlak hniam chuan a theih loh an tih tlat chuan Gen-Z leh Photaw te chu an la awm nuamsa zawk fe a ni,” tiin July ni 21 khan a thuziak hnuhnung ber a tarlang a. A thi hma deuh atangin a account pawh a inlock zui bawk a ni.

Captain Myint Oo chu July ni 24 khan a thi a. A nupui pawh covid vang thoin, July ni 21 khan a boral hmasa zawk bawk a. A thian hnai tak pakhat chuan, “LIB 9 fighter a nia, LIB 9 chungchang hi a sawi reng a. A ke tha a chak tawh lova, hliamna hnu hma pawh a nei teuh mai. An nupain van ramah hlimin leng tawh rawh se,” tiin thlahna thu a sawi a ni.The Tahan Post

 

Author: admin

Leave a Reply

Your email address will not be published. Required fields are marked *