UNHCR THILRI PHUR MOTOR- PAWL CHIN STATE MINDAT MIPI PAWL TANPI DINGIN AN THLENG THLENG ZO

Good news lungawi um nasa, UNHCR THILRI phur motor 5 cu raltlan pawl sawmdawlnak thil phurin Rangoon ih sin Mindat khuaah mini 19 July zanlam 6 (pm) hrawng ah khan an ra thleng.

Tusun ih sin zarh khat sung cu ei leh in lam thil si lo, covid 19 hrikleng donak thilri leh tarpaulin te , chithawng te, ihphah ding rizai te, puansin ding, blanket-te, choka hman ding pawl leh, Nitha hmang electric eng vang thei chi (solar lamps) leh thil dang phun phun cu rawn phur lut in sungkua 1000 ( amal bikah mi 5000 ) hrawng dawng thei dingin a ra thleng tan a si.

UNHCR hmalaknak hi minung sinak ih (humanitarian,) lam hawi zawngih tanpinak liau liau a si ih, tuih swmdawlnak thil ra thleng mi hi UNHCR staff pawl leh khawtlang leh kohhran ih mi rintlak tlawmngaiih rak tauntu pawl hnen ih sin feh tlangih tanpinak hi bulpak leh pawkawm hnen ih zem ding a si ih, Chin State sungih tanpinak leh sawmdawlnak mamawh mi pawl cu hawl suakin an mah pawl thawn hmuawih rel tlangnak nei dingin tumtahnak an nei a si an ti.

Tuih ra thleng mi hi Mindal raltlan camp 8 ih um mi hrang a si hrih ih, hmun dang ih um mi hrang khal ah hotu ten a tul danĀ  vekin an zem suak ding a si, Mizoram ih sin ZORO General Headquarters hruaitu pawlin Geneva ih UNHRC chairman hnenah vawi duai loin Mindat mipi pawl tuarnak hi a rak theih ter theu ih hi vek ih UNHRC ih sin tanpinak an rak neih thei hi an lungawm nasa a si tiah thu theih a si.

 

Author: admin

Leave a Reply

Your email address will not be published. Required fields are marked *