Tulio Kawlram Dothlen Nak Fiang Lo Mi Le CNA CDF Le PDF Dothlen Nak Um Tu Ning

Tulio cu sianginn dihmi lawmhpinak le puai ah ai bizi cio. Cun, EM le Copa America nih caan tet ngai in an kan umter hna. Cu lioah, Myanmar ahcun Covid-19 le MAH cu doh cuahmah si. Thisen le nunnak zeimawzet a liam cang. June ahcun “civil war” hi a tlung lai tiah ka rak ruah i, ttial pah tawn. Nain, June cu a van dih ruangmang i, ka kherhhlaimi a palh timi a fiang. Tutan Myanmar thil ruangah Laimi kan pale timi he zoom in biaruahnak tampi kan ngei. Ruah phu tiah ka ruahmi van char tuah usih.


“Kawl Ralkap (KR) nih an kan kah hmasa locun, CNA nih kah lo ding” tihi si. Minthutnak tuahmi cu a dong cang i, kahter ding hoih van chim ah – hriamnam bau, minung bau le tangka bau timi chim pah in CDF min in kan kah hna tihi chim si.“Anmah Kawlmi Tatmadaw dohmi ralkap an ngeih in Federal Army (FA) cu dirh ding” tihi si. Sullam cu miphun kip ralkap um hmasa hnuah, FA hi a van um lai. PDF min in kan doh tihi chim si. “Federal Union (FU) sernak caah, ram cio ngeimi miphun kan tlin hmasa hau” tihi si. FU kong ah an kalning hi “topdown si loin, bottom-up” policy in si. Cucaah a rau lai.“PDF min in kahdohnak kan tuahmi a tuan deuh ko” tihi si. A sullam cu PDF, CAF le CDF min in kahthahnak tuahmi a rak tuan deuh tinak si. “Kohhran tangka hi dohthlennak caah hman ding” tihi si. Thawhlawm le cheuhra-cheukhat zong CDM le PDF caah hman hau ti khi si.


Myanmar dirhmun cu a fiang cang. MAH nih uknak ap tthan ai tim lo. Zapi caah lam pathum lawng um cang: “civil war umter, ralzam in Myanmar chuahtak le mangttam temtuar” hi an si. Civil war a tlun hlanah, covid-19 le mangttam nih an vaivuanh dih te khawh men. MAH le ralkap uknak teinak caah a haumi hi thil pahnih lawnglawng um 1) Ralkap policy le cathanh nunpi lo, 2) Naypyidaw, Rangon le Mandalay ah civil war (kahdohnak) taktak umter hi si. Lairam le ramri hrawnghrang kahdohnak nih ralkap uknak thlenter kho lai lo.
Tulio kan pale nih KR an kan dohpining cun, caan zeimawzet a van rau rih lai. Caan sau a van kal lai i, lungthin le thisa linhnak a dai chinchin te lai tihi ruah awk um ngai. Tahchunnak in van chim usihlaw – CDM thawhbur ah lungthin ai thleng pah cang (a ngeimi nihcun million le billion zong khin an thawh ko lai nain). Cun, myanmar politics le tuanbia ah “interestnak” a linhsat level a zor pah ziahmah – pumpak le chungkhar kong buaipi cio si tthan cang. Tthangcho ram khuasa Laimi hi covid-19 zawtnak, chungkhar buainak le harsatnak tampi ton khawh si – cu bantuk nih thil tampi a zorter khawh. February lio hrawng thisa le lungput kha, zapi nunnak ah a thar in umter peng a hau. Kan hruaitu kut ah rian harsa le ngan a um.


Civil war um loin, caan zeimawzet a kal ahcun, vansan ah Min Aung Hlaing nih thil a tuah khawhmi cu: ASSK he hnatlaknak a tuah khawh – MAH nih zapi nunnak le harsatnak tthatternak caah tiah ASSK he phisinnak caah hnatlakmi a tuah khawh sual ahcun, 2008 phunghram tangah kan lut tthan kho. Tlaihmi pawl thlah, ASSK nih cabuai cungah politics ceih ding in bia van chim seh – tulio kan dirhmun zeimawzet ai dang kho men. Hriamtlai cheukhat he kahdaihnak minthut a tuahpi khawh hna – MAH nihhin kahdaih hnatlaknak hi tuahpi ai zuam te hna lai. Zapi temtuar le harsat lonak caah tiah a hlawhtling kho men (NCA zong a rak tuahpi khawh bal cang hna). MAH dohmi hriamtlai vialte hrawh ding in nawl a chuah khawh – “vawlei pumpi theih bak in Myanmar ah Tatmadaw dohmi hriamtlai, khua paoh kah le hrawh dih si lai tiah civil war cathanh in a tuah i, teinak a hmuh sual cun, communist system le ralkap uknak in an kan uk ko lai.
Note: “A chim cu fawi, a tuah hi har” ti si. Myanmar kong cu caan sau ngai rau rih ding si caah, dide lawng van ngai in issue dang buaipi pah hau lai.Credit: Van Nun Lian

Author: admin

Leave a Reply

Your email address will not be published. Required fields are marked *