COVID HRILENG LEH SUAL SIPAI HRANG IN A TIH BUAI ,THIHNA THLAZAR HNUAIA TAHAN ZOPHAI HI A LAINATAWM TAK ZET A NI

Nimin 3.7.2021 hi sual sipai thuneihna atchilh Sr.General Min Aung Hlainga piancham a ni a,Myanmar ram chhungah a piancham lawmpuina chu anchhia chitin reng nen a kuang lem leh a thlalakte chu diriam takin hal a ni.Zofate awmna Tahan khuaah chuan christian takin chutiang ang em chuan diriamna entir a ni lova,social media ah erawh hranghlui zaithiam samsei hniang in Min Aung Hlainga a diriamna vedio clip chu mi en a hlawh hle mai.

Kalay (Tahan) khua ah hian June thla chhung ringawt in Covid 19 hrilrng avangin chatuan rama min liansan takte hi mi 500 vel an chuang tawh a ni. Nitin chawhrualin enga tawng hmang hi Tahan khawchhungah mi 2 vel boral ang a ni bawk.

Kalaymyo (Tahan) bial hi Myanmar ram puma Sipai council sorkarin (Martial Law) a puan hmasak ber Township a ni.Rampum huap pawh hian mipui venghimtu pawl dinin zopa silai, Awlan, ulhbun leh laiphir hmanga sual sipai firfiak-te dolet hmasa ber Martar huaisente awmna khua a ni.

Nikum March thla khan America ram atangin Zomi (Tiddim) tlangval senior pakhatin,nupui nei tura a lo haw chu Kalaymyo ah cham in Tahan a paltlang vanga Covid damlo nei hmasa ber khua tia hriat lar a ni bawk.Covid hrileng a hluar tan tirh khan displine nei takin mi tlawmngai intel khawm-te zarah nuna pakhat mah chan loin buaina chu a lo pal tlang tawh a,Covid hrileng thawhhnihna pawh mipui ten lungrual takin dan leh hrai te an zawm a , khawtlang leh tlawmngai pawlte zarah dam takin harsatna tam tak karah an paltlang leh ta a.

Covid hrileng thawh 3-na erawh chu duh angin an in venghim thei ta lo a ni.Sipai firfiakten mipui sorkar laka thuneihna an chhuhsak avangin kawngtin rengin sipai sorkar lakah lungawi lohna lantirina nitin deuh thaw hian an lantir thin a,Nazaret Lal Isua a kal liam tur mipuite hmuhhman loh hlauva an pungkhawm aia nep chuang miah lovin a pui a pang te chu kawng an zawh mup mup a, mi chitin reng an tela , mi naran pianphunga rualban lote leh sakhaw puithiam-te pawh an bang bik lo a nih kha.

Covid hrileng do aiin mipuite zalenna rapbet tumtu democracy lamtluang tichhia sipai firfiakte dodalna hian hmun a luah tam tak a vangin Covid hrileng thawh 3-na meuh a lo thlen chuan zalenna ngainatu Kalaymyo (Tahan) mipui te chu he hrileng hian a man ta a ni.

Sorkar mumal a awm theih tak loh vangin Covid hrileng danna damdawi Vaccine pek leh dawn a ni lo va,Damdawiin lama Doctor, nurse , Medical & Healthcare staff te Civil Disobedience Movement (CDM) an zawm avangin damlo enkawltu tur an awm tawh lova,chungtianga damdawiin hnathawk ho man tumin sipai hoin an veh reng avangin an ni hi an bibo zo ta vek bawk a ni.

Covid hrileng thawh 3-na a lo thlen meuh chuan hrileng venhimna lama kawngpeng thuama hmalatute tun hmaa duty thin tlawmngai pawlte kha sipai hoin 5 aia awmkhawm an phal loh avangin hmuh tur an awm tawh lova, hmaituam leh tuam lo kawngpuia lo chhuak khaktu awm ta lo chu Covid hrileng hian nasa takin mipui a zuamin a ti buai ta a ni.

In khat atangin mithi 2 neih chang a awm a,vengtinah mithi an in zui tih hi nitina kan hriat thin chanchin tha lo , lungchhiat thak ber thil a lo ni t a.Fb leh Whatshap group-ah chhiat tawh chungchang kan hmu awl lova,vengtin zualko signboard hian thuthar ziah a ngai deuh reng mai.

Thlan enkawltu ten an mahni maiin an buaipui hlei thei tawh lova,thawktu tam tak lakbelh ngaiin a awm ta a,Damdawi dawr tam zawk khar a ni a,tlawmngaia in hawng tura an ngen hian fimkhur tak chungin an rawn zuar chhuak thin.

Tlawmngai pawlin an din Covid Centre ah thawktu an in daih lova,tichung pawhin mi inpe tlawmngaite rawn chhuak zelin PPE suit quality tha lo tak a inthuam in khawlum karah an nunna thapin mi tan an thawk mawlh mawlh hlawm a, lamliana Ambulance motor ri hian mipuite thla a ti muang lova,zan reh hnua silai leh bomb puak ri hian manganna belhchhahin an zanmu a chhing thei mawlh lo.

Oxigen hi tlawmngai pawl leh mi inphalte zaah a thlawnin pek chhuah thin a ni a,mamawhna a san em avangin a in daih mawlh lo.Nitin Oxigen bur lian 100 vel hi a rawn thlen rual rualin a zo nghal zel a,kawngpuia mi an reh thlap laiin chhungte tana Oxigen bur changin semchhuahna hmun erawh a lun thei hle mai.

Covid hrilen thawh 3-na a tantirh lai chuan kum upa leh natna benvawn neiten nunna an chan deuh tlangpui a,tunah chuan tlawmngaia thawktu thalai leh mithi vui thin Puithiam-te nunna hial a la tan ta.

Hetiang khawpa Covid hrilengin a hual thihna thlazar hnuaiah pawh Sipai firfiakte dodala kawngzawh leh indona chu an la tawpsan chuang lova, hlawhtlinna an neih hma chu chawlhsan zai an rel reng reng lo.

Mi tlawmngai , ram leh hnam hmangaihte awmna Zophai nuam takah hian sipai thuneihna chak huam huam te,an zarzo tum tlat mahni hmasial Rulputara lamtang mi huamhap te telin covid hrileng a kiam thuai thuai hun hi kan va nghakhlel tak em.

 

Author: admin

Leave a Reply

Your email address will not be published. Required fields are marked *