AWZATI, CUSTARD APPLE -MINUNG HRANGIH HRISEL NAK  LEH THATNAK  

Awzati, Custard apple minung hrangih a thatnak leitlun mithiam pawl ih sim mi phun sarih 7 vun a ti mawi ih, vun a ti tha, vun natnak a kil him.

Awzati, Custard apple, Kan lia mi pawl cun, thing thei leh thlai cin dan hi, zirhter kan tul lo ih, a zuarnak leh leh a thatnak kan theih cun, kan thiam zung2 mai an ti ih, tun tum chu, hriselnak hrangih a thatnak lam hi, ngai pawimawh hmasa seh la, kan tangkai pi sawn dingah ruat seh la a tha sawn ding a bang.

Awzati, Custard apple hi, Laimi pawl cun, kan theihnak a rei tuk zo ih, ei dah lo cu kan um lem lo ding, Thei thaw zet a si, a hrisel em2 a si, Thei ngaina hlawh tak khal a si ih, nauhuak ih sin pitar/putar thlengin an duh nasa a si,  kan hriselnak hrangih tha zet mi a si, a hrisel zia hi tam tak cun kan thei lo men thei, A thatnak pawl cu.

1. Mit hrangah a tha, Awzati Custard apple cun Vitamins tam tak a pai ih, kan khawhmuh fiah nakih nutrient pawimawh tak, vitamin C leh vitamin A a pai tam ruangah, mit hrang a tha nasa ih, himi bakah hin riboflavin leh vitamin B2 pawl, a pai ruangah, mit natnak lakah, kan fihlim phah thei ai.

2. Digestion a tanpi, Awzati Custard apple in kan Pumpi leh Ril hrisel nakih nutrient pawimawh tak mai, copper leh fibre a pai tam a si, fibre cun rawl pai tawih a tanpi ruangah ek a tinem ih, Magnesium a pai tel ruangah ek khal ding a kil ih, Pum pai nuam lo a tidam thei a si.

3. Taksa pem/na a tidam thei, Vitamin A a pai tam ruangah hin, a rah hmin that lai tak ah hin ulcer leh khawihli khal a tidam thei a si,  A rah hmin that lai tak ah hin, Vun an tihnawng thei ih, vun a ti mawi ih, vun na leh sen rum ri mi pawl khal a ti ziaawm thei a si, a rah kawr hi Ha hni na leh Ha nget hrang khalah a tha zet a si.

4. Lung hrangah a tha Awzati, Custard apple cun, magnesium and potassium a pai tam ruang ah, Lung natnak um thei lakah in kil him veng thei ih, tihrawl a ti hahdam ih, BP a ti tha thei a si, Niacin and dietary fibre, a pai tam ruang ah, thisen ih thausia (cholesterol), a timal thei ih, Vitamin B6 in, Lung natnak um thei lakah in kil him thei a si, lung khal a ti hrisel a si.

5. Taksa cau hrangah chaknak,  Taksa cau hrangah chakna petu, tha zet mi a si ih, Taksa cau leh cak lo pawlin an ei cun, an cak phah cih thei. Potassium a pai ruangah hin, thisen a tikal tha ih, tha cak lo um ding mi lakah kan him phah thei a si.

6. Ruh chuktuah na mi hrang ah, Magnesium a pai tam ruangah hin, kan ruh chuktuah leh, taksa ih thil tiril um mi pawl, a kil tha thei ih, ruh chuktuah ih tiril leh, acid um mi a hlawn suak ih, himi hin ruh natnak um thei arthritis leh rheumatism lakah in kil him thei a si.

7. NU nau pai hrang, Awzati, Custard apples hi Nau pai hrang ah a tha tuk ih, Nu rai laiah an ei cun nau neih khal an awl a si, nau khal an siat duh lo ih, hnawite/pawhte ti an nei tha duh an ti, cu len, Nu pum sung ih Naute tuahawk lai hrang khal ah a tha ih, an thluak a tichak ter ih, an thahri leh natnak do cak theihnak a ticak duh an ti.

 

Author: admin

Leave a Reply

Your email address will not be published. Required fields are marked *