FREE BURMA RANGERS “TE BURMA-AH AN CHE TA pu tluanga chhakchhuak

Nimin deuh atangin Kaya state lama sual sipai firfiak leh PDF mipui sipai te inkhuainuai-na chu ulhbun silai mai hmang tawh loin Semi Automatic Rifle te an hmang a, sipaite pawh in duh thawh takin Tank car leh helicopter hial an hmanna chhan chu mipui sipai pawl te nen FREE BURMA RANGERS pawlte an rawn tel tawh vang a ni.

Kum 70 chhung khawvela tualchhung indona reiber an tawrh hnu chuan Burma ram chu khawvela ram rethei ber tia chhinchhiahte zingah a tel ta a.Hetianga hun khirh tak a pal tlang chhung hian thuneihna atchilh sipai-ten a ram chhunga cheng ,mi a sang tel a singtel teh meuh an that hman a, anmahni eptu nia an hriat an man a,an nghaisa a, an hmeichhiate an pawngsual bawk a ni.

Chutianga rawva taka khawsa sipai te chet hluar-na bika awm te chu mahni sahimna zawngin hmun ralmuanga an ngaihah chuan an tlankhawm thin a ni.

Sipai an sorkar hmasak 1962 atanga 2010 kum thleng chu sawi loh tun hnaia sipai in thuneihna an pawnglak thlengin mipui te sipai firfiakte utthak hnawihna an tuar fo tawh a.

Sipai council sorkar din hma deuh Democracy chanve ang vela civil leh sipai in sorkarna an in tawm hun NLD sorkar lai tak ngial pawh khan , inkahhai thuthlung leh inremna lam hmalakna nei tho mahse, sipaite chet dan rawva tak hi tlangrama chengte ,ramri hrula khawsa te chungah a thleng fo mai. A bik takin Kachin,Shan ,Kaya leh Karen State bakah Arakan State lamah chuan Burma sipai ten a hleilen takin operation an nei a, mipuite chu puakphur turin an chhawr lui a,an eitur an chhuhsak a, inte hal sakin an feh kawng thlengin rahpuaah bomb (Landmines)an kam thin a ni.A sual deuh chuan an lo neih lai thlengin an tih chhiat sak thin a ni.

Chutianga Burma mipuite tah leh hathiala an rum lai chuan mite thinlungah hna thawk tan in he harsatna sukiang turin FREE BURMA RANGERS tih pawl a rawn piang chhuk ta nawlh mai.

The Free Burma Rangers pawl chu kum1997 khan Burma hnam chi tin tela din a ni.He pawlin a thil tum ber chu mahni mihring puite tana, tanpui ngaite tanpuia hnehchhiah tuarte humalh leh chhanchhuah hna hi a ni.A bik takin Myanmar khawchhak ramri hrul hnaiah a che chhuak deuh ber mai. A tul chuan mangang tanpui ngaite tan ralthuam an chelek hreh lem lova,hetianga tual an thah hi ropuina ram kai huna lallukum dawn loh phahna tur a ni lo tih an chiang hle mai.

He Free Burma Raners teams hian damdawi lam enkawlna leh counseling hnate bakah , mihring chanvo hnehchhuh vanga tawrhna (human rights violations )hrang hrang chu thlalak la khawm in documentary film a siam thin.Chuting chu online news angin a thehdarh a,UNHCR leh pawl lian tak tak te hnenah a thlen sak thin.Free Burma Rangers team hi “Mae Tao Clinic & Black Pack Health Worker” Team zinga pakhat a ni a tih theih ang.

Thilthlenna hmun 800 chuangah Free Burma Rangers team ten tanpui ngaite an tanpui tawh a.kumtin hian Kachin,Karen, Kayinni, Shan ,Yakhaine hnam telna team te chu ralthuam nena training hautak tak tak paltlangin an zir zo hlawm a, heng zirna peng hrang hrangte hi ralrel thiamna bakah

□ Public Health, First Aid, Advance Medical and basic Dental care, Ethnic issue, Ethics conflict resolution te hi an zir te a ni.

Free Burma Rangers pawl dintu hi American mi a hming lem atan karen hming “Tha-U-Wah-A-Pah” a ni a, a hming tak erawh David Eubank a ni. US Special forces sipai tang tawh thin leh “Filuller Theological Seminary” atanga zir chhuak pastor hial lo ni tawh a ni.Burma rama 1996 kum vela Misionary a lo thawh chhungin NLD hruaitu Aung Sang Suh Kyii nen pawh an lo in hmu tawh bawk a.Burma rama a cham chhungin tanpui ngaite tanpui kawngah leh thil tul chi hrang hrang chu a lo ti dimdiam vek tawh tih a rinhlelh awm lo ve.

2008 vela chhuak Film lar tak RAMBOO- IV kha kan en theuh tawh ang a, a changtupa Sylvester Stallone hi super hero ah a nihdan pangngaiin pa deuhin a rawn che leh a, hmuhnawm ti takin mit tla lek lekin kan lo thlir a nih kha.

He film ah hian Burma sipai te chu nunrawng tak leh tlangmi karen hnam-te chunga an kutthak hnawihna chi hrang hrang lanna a ni.

He film hmuh nawm tak hi Burma ram cinema hall lian tak tak leh ropui takah chuan chhuah phal a ni ta lova,thuneituten an khap tlat a ni.Cinema hall chu sawi loh mahni inchhunga CD player atanga en tura CD Disc an kawl ringawt pawh khan lungin tan theihna tling a ni.Tichung hian Rambo Part 4 hi a ram miten a ruk in an en deuh vek tawh a,keini Mizoram atang pawhin he film hi hmuhnawm kan tih ber zinga mi a ni.

He film an ti chhuak thei hi Free Burma Rangers te a hmuna an thil tawn hriat atanga an hmalakna a ni a, hei hian khawvelin a hmuh ve loh leh a hriat loh Burma sorkarin a mite rawngtaka a enkawlna leh awpbeh dan chiang taka tih lanna a ni.He film hian international levela Myanmar mipuite mihring chanvo humhalh a ngaih zia chiang takin a hmuh tir awm e.

 

Author: admin

Leave a Reply

Your email address will not be published. Required fields are marked *