VANGTLANG THIL ENKAWLTU TUR CHU MIPUITE KAN NI

Vantlang thil enkawltu tur chu mipuite kan ni, Japan rama zin India mi tlangval pakhat hian rel a chuang a. A lo chin țhin danin a hmaa țhutthleng awlah chuan a ke hlang kaia tlawhin a țhu a, Chutih lai chuan Japan mi, putar pakhat a lo lut a. India tlangvalin a tlawh mek țhutthlengah chiah chuan a rawn țhu ta chat mai a.

Tlangval chuan thinrim deuh mai hian, Țhutna awl tam tehlul nen, engati nge ka ke nghahchhanah kher chuan i rawn țhut a, a lo ti a,

Japan putar chuan, Tlangval, nang hi kan ram thil tichhetu i nih hi, I chungah ka thinrim khawp mai. Nimahsela, mikhual pakhat i ni a, mi hmaah ka sawisel lo vang che. I hma zawn chiaha țhutna awl tlawha i țhu kha i chin dan țhin niin ka ring.

Engti pawhin awm țhin mah la, kan ram mipui ta hi zah lo taka i tih atan ka phal lo. Chuvangin i hma zawna țhutnaah khan i ke hlang kaiin țhu suh. Ka chungah hian i ke kha rawn khang zawk ta che,” tiin, a lo chhang a,

Japan putar chuan sawi zawmin, “He rel hi ram mipuite sum hmanga lei a ni asin. Mipui ta chu mipui bawkin kan enkawl ang a, kan venghim tur a ni. Mi rama i zin a, hetianga i chin chuan mi hauh i la tawk ngei dawn a nia,” a ti ta a ni.

Khaw tin hian vangtlang thil kan nei țheuh va. Vangtlang thilte enkawla vawng țhatu tur chu mipuite kan ni e. Vangtlang thil zah thiam mi chu mi fing a ni ngei ang. Zah tak, uluk takin kan hmang țhin dawn nia.

 

 

Author: admin

Leave a Reply

Your email address will not be published. Required fields are marked *