INDIA IN MYANMAR RAMBUAI CHUNGCHANG A SUKTHLEK DAN

Laiking ang maia awrsen leh awrdum thin a ni mai lo maw,Myanmar rambuai chungchanga India sukthlek i lo thlir ng u hmiang.

Myanmar rama sipai firfiak ten thuneihna an pawng lak khan Myanmar raltlante chu mahni sahimna zawngin ramri kanin Idia ramri dep state 3 ah an rawn raltlan hlawm a, rin loh tak maiin India home ministry chuan thu chhuah siamin raltlante chu lo dawngsawng lo turin state tin Chief Secretary te hnenah thupek a chhuah a thawnlet turin a ti a ni.Mizoram Cheif Minister chuan Myanmar rama kan unau raltlante chu duat takin kan lo kuangkhuah ang a ti a,langsar takin a pui ngam ta lo thung a.

Sipai ten thuneihna an lak phat a tangin MZP te huaihawt in Political party te,Mizorama tlawmngai pawl lian zawng zawngte chuan rang taka hma la nghalin sipai firfiakte chet dan chu demin sitting demostration an nei a, raltlante chhawmdawl turin NGOs United for Democratic Myanmar pawl dinin theih tawpin hma an la a,ZORO pawhin Home Ministry thupek copy a hal hial a nih kha.India sorkarin Myanmar rama a rilru putdan hi kan hre thiam lo hle a ni Chuvangin Myanmar rambuai chungchanga India sukthlek i lo thlir ng u hmiang.

Myanmar ram politics chingchivet tak avangin ram pumah buaina a sosang zela,a kaikung ber sipai firfiakte thuneihna chak huam huam vanga civil sorkar nam thluk a nih hi khawthlang ram sorkar-te chuan dem namen lovin an dem laiin a ram thenawm ramri in nghen renga awm India sorkar chu a ka a chip hmak mai hi khawvel democracy sorkar dangte pawhin mak a ti hle mai.

India hi Myanmar nen ramri kilo meter 1600 vela sei intawmin British sorkar lakah independent a nei rual deuh thaw a,Prime Minister U Nu-a hunlai atangin inthiantha tak an ni thin. India ram tan hian Myanmar ram hi ASEAN ramte nen insumdawn tawn nan khawchhak lama kawngkapui ber a ni.Chuvang chuan India PM Modi’an ACT LOOK policy hmangin khawchhak lam thlira sumdawnna kalpui hi hlawhtlin hlan nghakhlel em emin mutmawh hnarmawh neiin a kalpui ta a, India leh Myanmar ram hi Bay of Bengal Tuipui lamah pawh km 725 vel thui in ramri a nei a, Quad country an tih mai American ,Australia ,Japan te nen an thawk tlang reng bawk a ni.Tichuan India hian a thenawm ram politics inlumlet dan chu a ngaihthah miah lovang tih hi kan hriat tur pawimawh tak hi a ni a,a thlithlai reng zawk a ni.

Myanmar ram chhungah hian India sorkar hian infra Structure a nei nual mai, A bik takin Myanmar nena inkal pawhna Kaladan Multi Model Transit Transit Road hi a pawimawh hle mai.Chuta tangin Thailand ram chhunga Highway nen thlun zawmin Vietnam,Lao,Cambodia ram thlengin thlun zawm a tum a,hei hian China ram thil tum Silk Road or RBI hi a khinlet theihna a ni dawn a,India project pawimawh ber ACT LOOK POLICY hi a hmawr a bawk tep tawh bawk a ni.

A ngaih pawimawh ber Act look policy ti hlawhtling tur chuan Myanmar ramah engang mi pawh in thuneihna chang pawh ni se a sorkar apiangte zarzo hi a tum ber a ni.

India hian khawvel hriatah sipaite thuneihna an pawnglak chungchangah rundal lekin India Foreign Ministry atangin word 46 lek awm thuchhuah a siam a, Myanmar ram buaina thil thleng hi pawi a tih thu leh democracy lamtluang zawhtute a thlawp thu a sawi lang a ni, Febuary ni 18 khan Quad ram Foreign Minister meetingah thuchhuah pakhat a siam leh a, Myanmar ramah remna leh muana thlen a pawimawh thu leh Democracy panna hun laihawl (transition period) a nih thu chauh a sawi lang leh a ni.

India sorkar hian sipai te thuneihna an pawnglak hi chiang takin a dem ngam lo tih a lang chiang hle mai.India hian Myanmar Military Council sorkar hi hmaizahna neimiah lova a dawr palh hlauh chuan Myanmar hian Sumdawnna leh thil dang thawhhona lamah India ram thlauhthla in China ram zawk hi a belbul in a in ngat vek ang tih a hlau hle tih a chiang mai.Sipai sorkarin an thuneihna chelh tum hun chhung hi kum khat aia tam a rei thei tih vai thluk hian an lo hisap diam tawh a, India hian a ram in hlawkna a tel theih nan Sipai sorkar hi a be chhe mai ngam lova, NLD sorkar laia ram pahnih inkar a thuthlung an neih mek insumdawn tawnna,ram venhimna lama thawhhona,inkalpawhna, Technology lama thawhhona leh thil dangte chu thuanawp loin kal pui zel a duh a ni.

1990 kum khan India hian sipai sorkar lakah thil tihfuh loh deuh mai a nei a, Sipai sorkar hi nasa taka demin eptu hruaitu Daw Aung San Suh Kyii kha Jawahharlal Nehru Award for International Understanding lawmman an hlan a, Khan hun laia sipai sorkar hotute chuan India thil tih hi an lawm lo hle a, ramri hrula Myanmar sipai te nena Joint Operation Golden Bird an neih mek India hmarchhak hel te beihna chu Myanmar sipai ten an chawlhsan ta a ni.

Vai thluak takin democracy lam hawi zawngin thlir loin mahni hlawkna lam hawi zawng chauh thlir ran in Naypitaw sorkar hi a thlithlai reng a, UN Security Council ah hian non-permanent member a nih angin Myanmar ram democracy chungchang leh law & Order lamah tanpuitu nihna mawhphurhna nei a nih bawk si avangin Sipai Council sorkar hi ualau takin a dem ngam lo tih a thuchhuah atang pawhin kan hmu thei ang.

Tuna sipai ho in an hren mek Daw Aung San Suh Kyii hi nakin-ah thuneihna rawn chang lehin ram hruaitu berah lo ding leh ta se India ram tan chen fakawm a ni dawn leh dawn loh tih vel hi a thlithlai kual vel rih a tuilairap din hmunah a ding rih a ni. Pu tluanga chhakchhuak.

 

Author: admin

Leave a Reply

Your email address will not be published. Required fields are marked *