MYANMAR MIPUITE TI RALKHEL-TU “PYU SAW HTI” GANG CHU

USDP thupuangtu chuan an pawl din a nih loh thu sawiin a pha nasa thung, Tunlai hian ” Pyu Saw Hti” ပျူစောထီး tih hming inphuah chawp a, Myanmar mipui te civil dress nen rawn man thin silai keng pawl pakhat hi a rawn hrang thar ta a.

A hrechiangte sawi dan chuan he pawl member-te chu USDP mi leh sa ,sipai bang pension chhuak tawh-te ,hman deuh a chimawm taka chen thin” Ma Bah Tah” မဘတ pawl member te leh veng chhunga mi hnawksak kawktu/hektu kan tih mai DALAN tia hriat intel khawm te an ni.He pawl hi mipui din “Peoples Defence Force” ten Kan la nuai chimit hmasak ber tur an ni a ti.

Pyusawthi (ပျူစောထီး) tih hi hmasang Pagan lalram hunlaia Myanmar thawnthu a Lal pakhat hming ve mai a ni a.A takin a awm tih pawh history -ah hriat chian a ni ngai lem lova, Hmasang buddhist thawnthubu ah chuan AD (167 -242 )chhungin Pagan Dynaty hunlaia lal lo ni tawh a nih hmel an ti.

kum zabi 18 lai vela an record ziah dan chuan Ni lalfapa (Solar prince) leh Dragon Lal fanu (Princess ) inkawpchawi atanga lo piang a ni an ti bawk.

Kongbaung Dynasty hunlaia Hmannan Yazawin(Royal Chronicle ,ie 1832 AD ) a an ziah dan thung chuan King Pyusawthi-a hi a tak taka lo awm tawh” Tagaung kingdom ” atanga thlahtute chhuilet chuan Budddhist Mythology lama Maha Sammatha Lal thlah kal zel a ni tiin an chhui lut ve thung.

Historian ho chuan kum zabi 8 bawr vela China ram Nanzhao Kingdom atanga Myanmar ram laili Irrawady lui (Airawh lui) phai zawl a an rawn run lai vela lo tel ve Pagan kingdom dintu hmasa a ni e an ti thung.

Tunlaia rawn lar thut PYUSAWHTI GANG hi an Fb group in sawidan chuan Myanmar ram sorkar rorel khawl rang taka a kal tluan leh theih nan Myanmar Military Council sorkar ban tha ti chak tura din a ni a,Sipai sorkar behchhan tlat a din a ni an ti.An zingah sipai tanglai pawh an tel an ti nghe nghe bawk.

CRPH leh NUG sorkar hmalakna ti thuan awp zawngin an che tin a.An member te chu kekawrbul an ha thin a,an hmel hriat theih loh turin hmaituam tlatin lukhum mit khuh deuh thawin a hmalamah an khum fual a .Private motor hmangin vengchhungah an duh hun hunah lutin an kutah ralthuam kengin mi inah an pawng luh tawp tawp thin a ni.Kawngka an kalh pawhin an ti chhia a dan lo ang takin mi an pawng man thin ani.

An sawi hmang chuan security force-te aiawh a an mi tirh an ni a, USDP mi leh sa hi a phusa ber zingah an tel chiang a ni tiin mipui aiawhtu pawl Mr. Yan Naung Thein-a chuan a sawi.Hei hi Security force te dan bawhchhiatna hi khawvelin an thlithlai reng avangin sipai leh police te hming hliau loh nana din a ni awm e.

Sipai sorkar in ram rorelna an chelh hmasak lai khan Military Intelligent Chief Lt.Gen.Khin Nyunt-a pawl ho hian hetiangin thuneitu ber dinhmunah dinin mipui te an lo awp tawh thin bawk.

Myanmar Zophai leh Zoram khawvela zofate zingah hetiang mi tlem zawk hamthatna humhim leh thuneihna atchilh vanga mipui pawisawitu Hektu/kawktu in lo awm palh hlauh chuan a pawi dawn lutuk.USDP mi lehsa lo tang ulh lutuk in awm pawhin lo in sum teh u khai.

 

Author: admin

Leave a Reply

Your email address will not be published. Required fields are marked *