A thi mi kongah thawngpang thar bik mi kan thei khawh mi a um mi cu mah hi a si

Hakha SAC Palik nih an Tlaihmi Pu Tler Ling a Nunnak a Liam. May 9 ah Hakha, Nawi ah SAC palik nih an tlaihmi Pu Tler Ling (kum 60 hrawng) cu nihin ah a nunnak a liam, tiah chungkhar sin in thawng kan theih. Pu Tler Ling hi nihin zinglei ah ralkap motor in Kalaymyo lei ah thlopbul ding in an kalpi i lampi ah a nunnak a liam hi a si.

Pu Tler Ling innpa pakhat nih, “Nihin ah Kalaymyo sizung lei ah an kalpi i, lampi ah a nunnak a liam. An hrem tuknak ah a thihmi a si kho men,” tiah The Chin Journal ah a chim. May 10 ah Nawi ah minung 5 an tlaih hna i, Pu Tler Ling le a hawile pahnih hi Ngauthutlang ah an tlaih ve hna.

Pu Tler Ling hi Hniarlawn khuami a si i Hakha khua, Cherry lamsang, UPC biakinn thlang ah a ummi a si. Hakha lei ah ralkap nih a ruak an rak kirpi lio a si. Kalaymyo lei ah Pu Tler Ling a kalpitu ralkap pawl nih Hakha kan phak tik ah kan in chawnh te hna lai tiah chungkhar an rak chawnh hna, tiah kan theih. Hakha SAC Palik Tlaihmi Pa Khamh Bawi a Nunnak a Liam. Hakha SAC palik nih May 9, zinglei sml. 9:00 hrawng ah Hakha Khuathar ah an rak tlaihmi Pa Khamh Bawi (kum 27) cu May 11 ah a nunnak a liam ve, tiah thawng kan theih.

Pa Khamh Bawi le Pu Tler Ling hi May 9 ah an tlaih hna i May 11 ah Kalay ralkap sizung ah thlop ding in ralkap nih an kalpi hna i an pahnih in an nunnak a liam. Hakha ah tlaih a tongmi hna kong a tawlreltu pastor pakhat nih, “Atute bak kha Rungtlang ralbawi (Byu-ha-hmu thar) nih phone a rak kan chonh.

A thimi Bawia timi hi Pa Khamh Bawi a si ko a kan ti. Cuap zawtnak in a thi timi fianternak siizung catlap zong kan ngei ko a kan ti,” tiah The Chin Journal ah a chim. Pa Khamh Bawi ruak cu Pu Tler Ling ruak he Kalaymyo ah hmun khat ah SAC ralkap nih an khangh tti hna. Pa Khamh Bawi hi Thantlang peng, Thangzang khuami a si i, fa pahnih a ngeih hnu ah a nupi he aa tthenmi an si. Hakha Khuathar i Pi Hnem Zing inn ah aa thum i May 9 zinglei ah palik nih an tlaih lio ah Pi Hnem Zing innchung thilri zong an lehpiak dih hna. Asinain, Pi Hnem Zing inn ah hin Pa Khamh Bawi he aa pehtlaimi phungning lo thilri SAC palik nih an hmuhmi a um lo, tiah kan theih. The Chin Journal

Author: admin

Leave a Reply

Your email address will not be published. Required fields are marked *